النور ملو الشارع
ومليون راديو والع
الساعه اتنين صباحا
لكين ايه الموانع
الخلق رايحه جايه
والدنيا لسه حيه
مليانه بالهأو أو
وزعيق القهوجيه
واحد يقول لواحد
خليك يا عم قاعد
التانى يقوله شكرا
ده انا م المغرب مواعد
فيه سهره لسه عندى
فى بيت فلان افندى
ح ناكل حاجه حلوه
ونشرب تمر هندى
واللى تروح دالقه جردل
فوق حضرة المبجل
طبعا صاحبنا يزعل
وينفجر شتايم
والحى كله يوصل
مابين مصلح ولايم
اللى يقول : ياجماعه
واللى يقول : يابهايم
ومطرب الاذاعه
يصرخ وف وجده هايم
ولو طرطقت ودنك
فى وسط دى العظايم
تسمع مسحراتى
بطبله صوتها واطى
بيقول : أصحى يانايم